Kea "maeɛ 'ma ‑tɩ' o ‑ae
10
Dɛɛ ‑tɩ ‑ɩn tɛɛn kɩɩn ‑ɛ 'oo Tʋ "bo,dɛɛ ‑tɩ 'kle 'a nɔ" ‑ma pa 'kwla a‑?
2 'Diwɔnynii 'a kplɩn 'a "jrii nyni 'a ‑tɩ' 'ʋn ɛ,
ɔɔ criɛ wɛenyʋ bʋ ‑sɔn i ‑wɛe ɔ 'je ɔɔ' "klɛ 'di 'kpa.
3 'Diwɔnnynii a ‑tuɛ" 'nynɩ
'de dɩ ɔ 'jea 'ble 'a ‑tɩ' 'ʋn.
‑Wɛe nyʋ "jrui dii a ‑flɛɛn Tʋ "bo 'de ɔɔ wlaa nɔ.
4 Dɛsaʋnʋɩ a nynaa "jru i,
ɔ 'na Kea se nɩ‑ ‑wɛe ɛ 'je nyʋ dɛsaʋn 'a ‑kao "kpei ja‑.
Dɛsaʋnʋɩ 'a tɔ' ‑wee'‑ ‑nao.
5 Dɩ ‑wee'‑ a 'wɔɔn ɔ kwa,
Kea 'a kɛ' se ɔɔ' ‑tea' ‑te,
ɔɔ' tʋ a du nyʋ ‑wee'‑ 'mɛ.
6 Dɛ ɔɔ 'tmʋa 'de ɔ pɛe o ɛmɛ ‑nɩ 'kle ‑tɩ se 'ʋn 'jei.
'Ma muɛ 'mʋa‑ 'ʋn nɩa' jeejee.
7 Nyʋ ‑soo' o pooa' o, nyʋ 'srɛi pooa' ke
nyʋ "jrui dia' mɩ ‑ti" 'de ɔɔ' kplɩn 'ʋn.
Dɛsaʋn ke 'srɛ 'ɛ 'sʋ mɩ ‑ti" 'de ɔɔ' mɩɩɔ "kpei.
8 Ɔ pa 'kwla 'de ‑kwlɔ ‑wɔin",
ɔ pa 'kwla ‑wɛe ɔɔ 'dba nyʋ ‑sea' dɛ jrɛ' nʋ,
ɔɔ' "jri a cɛn wɛenyʋ 'ʋn.
9 Ɔ 'pɛn i 'de ɔɔ' 'kwla pa na'
ka ‑plaa nɩa 'de ɛɛ' 'pɛn na' a.
Ɔ bla ‑gbae ‑wɛe ɔɔ kpʋn wɛenyɔ
‑wɛe ɔɔ ‑criɔ' ɔɔ poɔ 'de ɔɔ' nya" 'sai 'di.
10 Ɔ bla 'blʋɔ‑, ɔ ‑teɛ ‑snii'
‑wɛe wɛenyʋ a 'kpa 'de ɔ 'kwa.
11 'De ɔ pɛe o ɔ 'na: Kea a "mae',
ɛɛ' ‑gbʋn dɛ jrɛ' ja 'de ɛɛ' 'je dɛjrɛ' i.
12 ‑Sɔn 'ʋn Tʋ "bo, ‑kpa' sʋn "jɛi,
‑ɩn ‑bo wɛenyʋ o "maeɛ
13 Dɛɛ ‑tɩ 'diwɔnynii 'je Kea ‑flɛɛn?
‑Wɛe ɔ 'je wlu ka ‑maa' ja nyʋ dɛsaʋn 'a ‑kao "kpei ɛ‑.
14 'De ‑mɔ, ‑bo ʋʋa jea nyʋ 'kle ‑tu",
‑bo ʋʋ jɔ "jrii "kaea' ‑pʋn"
‑ma ‑jɩɩ', ɩ ‑wee'‑ nɩɛ 'de ‑ʋn 'kwa,
'de ‑ʋn 'kwa mɔ wɛenyɔ "tai ɔɔ' ‑cɛi".
‑Mɔ ‑ɔɔ po "kwie nynuu sʋn o.
15 ‑Ɩn ‑dba 'diwɔnynii "jru i,
dɩsaɩn ɔ nʋa, ‑ɩn ‑tee' ɔ i ɔ 'je ɩa' "kuuan po.
Nyʋ 'bʋ i "jriɛ 'jeeɛ 'bode.
16 Tʋ "bo nɩɛ Tʋ "bo jeejee,
nyɔ ‑sea' Kea juuo se 'e ɛɛ' 'blʋa ‑nɛ "kpei sie i.
17 Nyʋ ‑ʋʋa jaa ʋʋa' ‑cɛ" ja Tʋ "bo,
‑ma poɛ ʋʋa' tɔ' "kpei naadɩ‑ doun" o,
‑ma kuuɛ ʋʋa' dɩ i, ‑ma siɛ ʋʋpʋ‑ doun" o.
18 ‑Wɛe ‑ɩn ‑je "kwieju ke nyɔ ʋʋa ‑tua" 'kle 'a "kpei ‑tɩ 'tmʋ,
‑wɛe nyɔ Kea nʋa 'blʋ ɛ nʋa, ɔɔ' nʋʋdɩ 'bo nyiɔ faʋn' poɛ.